ਇਕ ਪ੍ਰਸਿੱਧ ਦੇਸੀ ਰੁੱਖ ਬੇਰੀ ਦੇ ਪੱਕੇ ਫਲ ਨੂੰ ਬੇਰ ਕਹਿੰਦੇ ਹਨ। ਪੱਕੇ ਹੋਏ ਬੇਰ ਦਾ ਰੰਗ ਲਾਲ ਹੁੰਦਾ ਹੈ।ਬੇਰ ਇਕ ਮਸ਼ਹੂਰ ਪੇਂਡੂ ਫਲ ਹੈ। ਪਹਿਲੇ ਸਮਿਆਂ ਵਿਚ ਹਰ ਜਿਮੀਂਦਾਰ ਦੇ ਖੇਤ ਵਿਚ, ਸਾਂਝੀਆਂ ਥਾਵਾਂ ਵਿਚ, ਜੰਗਲ ਬੇਲਿਆਂ ਵਿਚ ਬੇਰੀਆਂ ਆਮ ਹੁੰਦੀਆਂ ਸਨ। ਲੋਕ ਬੇਰ ਖਾਂਦੇ ਵੀ ਬਹੁਤ ਸਨ। ਬੇਰਾਂ ਨੂੰ ਸੁਕਾ ਕੇ ਵੀ ਖਾਧਾ ਜਾਂਦਾ ਸੀ। ਬੇਰੀ ਨੂੰ ਪਹਿਲਾਂ ਖਿਚੜੀ ਲੱਗਦੀ ਹੈ। ਖਿਚੜੀ ਤੋਂ ਕੱਚੇ ਬੇਰ ਬਣਦੇ ਹਨ ਜਿਨ੍ਹਾਂ ਨੂੰ ਕਾਕੜੇ ਬੇਰ ਕਹਿੰਦੇ ਹਨ। ਕਾਕੜੇ ਬੇਰ ਪੱਕ ਕੇ ਬੇਰ ਬਣਦੇ ਹਨ। ਪੱਕੇ ਬੇਰਾਂ ਨੂੰ ਲੀਲੂ ਬੇਰ ਕਹਿੰਦੇ ਹਨ। ਜਿਹੜੇ ਬੇਰ ਬੜੇ ਸਾਈਜ਼ ਦੇ ਹੁੰਦੇ ਹਨ, ਉਨ੍ਹਾਂ ਨੂੰ ਗੜੌਦੇ ਬੇਰ ਕਹਿੰਦੇ ਹਨ। ਕਈ ਬੇਰੀਆਂ ਦੇ ਬੇਰ ਖਾਣ ਵਿਚ ਖੱਟੇ ਹੁੰਦੇ ਹਨ। ਇਨ੍ਹਾਂ ਬੇਰਾਂ ਨੂੰ ਗਲਘੋਟੂ ਬੇਰ ਕਹਿੰਦੇ ਹਨ ਕਿਉਂ ਜੋ ਇਨ੍ਹਾਂ ਦੇ ਖਾਣ ਨਾਲ ਗਲ ਫੜਿਆ ਜਾਂਦਾ ਹੈ। ਜੋ ਬੇਰ ਮਲ੍ਹਿਆ ਨੂੰ ਲੱਗਦੇ ਹਨ, ਉਹ ਛੋਟੇ-ਛੋਟੇ ਬੇਰ ਹੁੰਦੇ ਹਨ। ਉਨ੍ਹਾਂ ਬੇਰਾਂ ਨੂੰ ਕੋਕਨ ਬੇਰ ਕਹਿੰਦੇ ਹਨ। ਇਕ ਪਿਉਂਦੂ ਬੇਰ ਹੁੰਦੇ ਹਨ ਜਿਹੜੇ ਪਿਉਂਦ ਕੀਤੀ ਬੇਰੀ ਦੇ ਰੁੱਖ ਨੂੰ ਲੱਗਦੇ ਹਨ। ਬੇਰਾਂ ਨੂੰ ਗਰੀਬਾਂ ਦਾ ਮੇਵਾ ਆਖਿਆ ਜਾਂਦਾ ਹੈ।