ਮਿੱਟੀ ਪੁੱਟਣ ਵਾਲੇ ਲੋਹੇ ਦੇ ਖੇਤੀ ਸੰਦ ਨੂੰ ਕਹੀ ਕਹਿੰਦੇ ਹਨ। ਕਈ ਇਲਾਕਿਆਂ ਵਿਚ ਕਹੀ ਨੂੰ ਕਸੀ ਕਹਿੰਦੇ ਹਨ। ਕਹੀ ਬਹੁ-ਮੰਤਵੀ ਕੰਮ ਦੇਣ ਵਾਲਾ ਖੇਤੀ ਸੰਦ ਹੈ। ਪਹਿਲੇ ਸਮਿਆਂ ਵਿਚ ਜੰਗਲਾਂ ਨੂੰ ਕਹੀਆਂ ਨਾਲ ਪੁੱਟ ਕੇ ਆਬਾਦ ਕੀਤਾ ਜਾਂਦਾ ਰਿਹਾ ਹੈ। ਕਹੀਆਂ ਨਾਲ ਖਾਲ ਬਣਾਏ ਜਾਂਦੇ ਹਨ। ਕਹੀਆਂ ਨਾਲ ਕਿਆਰਿਆਂ ਦੀਆਂ ਵੱਟਾਂ ਬਣਾਈਆਂ ਜਾਂਦੀਆਂ ਹਨ। ਕਹੀਆਂ ਨਾਲ ਟੋਏ ਪੁੱਟੇ ਜਾਂਦੇ ਹਨ। ਕਹੀਆਂ ਨਾਲ ਖੇਤਾਂ ਵਿਚ ਦੇਸੀ ਖਾਦ ਖਿੰਡਾਈ ਜਾਂਦੀ ਹੈ। ਕਹੀਆਂ ਨਾਲ ਖਾਲ ਵਿਚੋਂ ਖੇਤ ਨੂੰ/ਕਿਆਰਿਆਂ ਨੂੰ ਪਾਣੀ ਲਾਉਣ ਲਈ ਨੱਕੇ ਛੱਡੇ ਜਾਂਦੇ ਹਨ। ਘਰ ਲਿੱਖਣ ਲਈ, ਘਰ ਦੀ ਉਸਾਰੀ ਕਰਨ ਲਈ ਕਹੀ ਨਾਲ ਹੀ ਘਾਣੀ ਤਿਆਰ ਕੀਤੀ ਜਾਂਦੀ ਹੈ। ਸੀਮਿੰਟ ਵਿਚ ਰੇਤਾ, ਬੱਜਰੀ ਮਿਲਾਉਣ ਲਈ ਵੀ ਕਹੀ ਵਰਤੀ ਜਾਂਦੀ ਹੈ।